Тоқаев дизель отыны тапшылығына қатысты пікір білдірді

Алматы, NEGE. «Қазан айында еліміз дизель отыны тапшылығына тап болды. Бұл ахуал дизель отыны бағасының өсуіне ғана емес, сонымен бірге көлік компаниялары, Қазақстан темір жолы үшін де проблема туындатты.

Сонымен қатар коммуналдық және жол қызметтерінің тұрақты жұмысын қамтамасыз етуде тәуекелдер алып келді», - деді Қасым-Жомарт Тоқаев Екібастұзда өтіп жатқан моноқалаларды дамыту мәселелеріне арналған жиналыста. Бұған дейін хабарлағанымыздай, бүгін Қасым-Жомарт Тоқаев жұмыс сапарымен Павлодар облысының Екібастұз қаласына келді.

Мемлекет басшысы жұмыс сапары барысында моноқалаларды дамыту жөнінде кеңес өткізіп, Президенттік жастар кадр резервінің өкілдерімен кездеседі. Сонымен қатар қаладағы индустриалды кәсіпорындарға барады деп жоспарланған.