Тоқаев Түркістан қаласына ұшып барды
Мемлекет басшысы Қасым-Жомарт Тоқаев Түркі мемлекеттері ұйымының бейресми саммитіне қатысу үшін Түркістан қаласына барды, деп хабарлайды Ақорда.
Астана, NEGE. Түркі мемлекеттері ұйымына мүше елдер басшыларының бейресми саммиті бүгін, 15 мамыр күні өтеді. Жиында «Жасанды интеллект және цифрлық даму» тақырыбы талқыланады.
Айта кетейік, түркі мемлекеттері арасындағы жан-жақты ынтымақтастықты нығайтуды мақсат ететін Түркі мемлекеттері ұйымы 2009 жылы үкіметаралық ұйым ретінде құрылды. Бұрынғы атауы – Түркітілдес мемлекеттердің ынтымақтастық кеңесі.
Құрылтайшы мемлекеттер – Әзербайжан, Қазақстан, Қырғызстан және Түркия. 2019 жылғы қазанда Бакуде өткен 7-саммитте Өзбекстан толыққанды мүше ретінде қосылды. Венгрия, Түрікменстан, Солтүстік Кипр Түрік Республикасы және Экономикалық Ынтымақтастық Ұйымы бақылаушы мүшелер ретінде қосылған.