Тоқаев Трамптың Украина бойынша бейбітшілік жоспарын қолдады
Қасым-Жомарт Тоқаев АҚШ Президенті Дональд Трамптың Украинадағы ахуалды реттеуге бағытталған жоспарына қолдау білдірді.
Астана, NEGE. Бұл туралы президент Армения премьер-министрімен келіссөздер қорытындысына арналған брифингте айтты.
Қазіргі күрделі геосаяси жағдайда АҚШ президенті Дональд Трамптың Украинадағы ахуалды реттеуге бағытталған күш-жігерін және ұсынып жатқан жоспарын қолдаймын. Сондай-ақ Қазақстан Армения мен Әзербайжанның бейбітшілік жолындағы ортақ ұмтылысын толық қолдайды, – деді Тоқаев.
19 қарашада Трамп Ресей мен Украина арасындағы бейбітшілікті орнатуға арналған 28 тармақтан тұратын жоспарды мақұлдады. Бұл жоспарды соңғы бірнеше апта бойы Ақ үй қызметкерлері жасырын түрде әзірлеген, Ресей елшісі Кирилл Дмитриев пен Украинаның ресми тұлғаларымен кеңескен.
«Жоспар екі тарапқа да тұрақты бейбітшілікті қамтамасыз ету үшін қауіпсіздік кепілдіктерін ұсынуға бағытталған», – деп хабарлады NBC телеарнасы.
