Тоқаев пен Трамп Давоста не жайында сөйлесті?
Давоста өткен Бейбітшілік кеңесінің жарғысына қол қою рәсімінде Мемлекет басшысы Қасым-Жомарт Тоқаев пен Америка Президенті Дональд Трамп не жайында сыбырласқаны мәлім болды.
Астана, NEGE. Президенттің баспасөз хатшысы Руслан Желдібай екі басшының өзара әңгімесі мазмұнынан хабардар етті.
«Қасым-Жомарт Тоқаев Давос форумында таратылған "Президент Дональд Трамптың 365 күн ішіндегі 365 жеңісі" деп аталатын ресми құжаттың 177-тармағында Қазақстанның Ибраһим келісімдеріне қосылғаны жетістік ретінде көрсетілгеніне назар аударды.
Бұдан бөлек Президент Америка көшбасшысына ақыл-парасатқа негізделген ішкі саясатты жүзеге асыруда табыс тіледі», – деп мәлімдеді ол.
Ал Дональд Трамп Бейбітшілік кеңесін құру туралы бастамасына қолдау көрсеткені үшін Қасым-Жомарт Тоқаевқа алғыс айтқан.
Айта кетейік, бүгін Мемлекет басшысы Қасым-Жомарт Тоқаев Дональд Трамптың шақыруымен Давос қаласына жұмыс сапарымен барды. Онда Президент Газа бойынша құрылған Бейбітшілік кеңесінің жарғысына қол қойды.
