Павлодар облысының бұрынғы әкімі Қырғызстанға елші болып кетті
Мемлекет басшысы Қасым-Жомарт Тоқаевтың жарлығымен Қазақстанның сегіз елдегі төтенше және өкілетті елшілері ауысты.
Астана, NEGE. Ақорда ақпаратынша, Павлодар облысының бұрынғы әкімі Әбілқайыр Сқақов Қазақстан Республикасының Қырғыз Республикасындағы төтенше және өкілетті елшісі лауазымына тағайындалды. Ол 2020-2022 жылдары Павлодар облысын басқарған, кейінгі екі жылда Әлеуметтік медициналық сақтандыру қорының басқарма төрағасы болды.
Сондай-ақ Президенттің жарлығымен Бақыт Батыршаев Қазақстанның Қатар мемлекетіндегі, Анель Бақытбекқызы Мажарстандағы, Болат Иманбаев Сербия Республикасындағы төтенше және өкілетті елшісі болып тағайындалды. Болат Иманбаев Қазақстанның Армения Республикасындағы елшісі лауазымынан босатылды.
Ал Қазақстанның Үндістан Республикасындағы елшісі Азамат Есқараев Қазақстанның Бангладеш Халық Республикасындағы, Бутан Корольдігіндегі, Мальдив Республикасындағы, Непалдағы төтенше және өкілетті елшісі қызметін қоса атқарушы болып тағайындалды.
