Тоқаев алматылық мұғалімді құттықтады
Мемлекет басшысы Қасым-Жомарт Тоқаев мектеп мұғалімі Татьяна Белоусованы әлемдегі ең үздік 50 педагогтің қатарына енуіне орай құттықтады, деп хабарлайды Ақорда.
Астана, NEGE. Алматы қаласындағы №95 мектеп-лицейі химия пәнінің мұғалімі Татьяна Белоусова Global Teacher Prize халықаралық байқауының қорытындысы бойынша әлемдегі ең үздік педагогтердің бірі атанған.
«Бұл жоғары баға – сіздің өскелең ұрпаққа тағылымды тәрбие мен озық білім беру ісіне сіңірген ұзақ жылғы еңбегіңіздің жемісі. Біздің мақсатымыз – зияткер ұлтқа айналу. Сондықтан мемлекет әрдайым мұғалімдердің мәртебесін көтеріп, оларды жан-жақты қолдайды», – деді Қасым-Жомарт Тоқаев.
Айта кетейік, 41 жыл ұстаздық еткен Татьяна Геннадьевна – Қазақстан мектептерінде оқытылатын 7–11-сыныптарға арналған химия оқулықтарының авторларының бірі. Сондай-ақ ол – 1999 жылдан бері Ұлттық тестілеу орталығында тапсырма құрастырушы және сарапшы. Оның шәкірттері олимпиадаларда тұрақты түрде жеңіске жетіп келеді.
