Тоқаев АҚШ пен Иран арасындағы келісімді құптады
Мемлекет басшысы Қасым-Жомарт Тоқаев Америка Құрама Штаттары мен Иран Ислам Республикасы қол жеткізген келісімді құптады.
Астана, NEGE. Бұл жөнінде ол X желісіндегі парақшасында жазды. Тоқаев жазбасында қазіргі күрделі халықаралық ахуал жағдайында аймақ және әлемдік қоғамдастық үшін мұндай келісімнің маңызы зор екенін атап өткен.
«Біз тараптардың саяси ерік-жігерін жоғары бағалаймыз. Бұл өзара сенімді қалпына келтіріп, екі жаққа да тиімді шешім қабылдауға мүмкіндік берді. Сын сәтте батыл әрекет етіп, стратегиялық көрегендік танытқан АҚШ Президенті Дональд Трамптың көшбасшылығын ерекше атап өтеміз. Сонымен қатар Иран Ислам Республикасы жетекшілігінің конструктивті ұстанымын қуаттаймыз», – деп жазды ол.
Сондай-ақ Президент Қазақстан тарабы осы бейбіт келісімге қол қою «Таяу Шығыста және одан тысқары жерлерде бейбітшілік пен тұрақтылықтың берік негізін қалайтынына сенім білдіретінін» жеткізген.
Айта кетейік, АҚШ президенті Дональд Трамп Вашингтон Иран Ислам Республикасымен келісімге келгенін және көп ұзамай әскери-теңіз блокадасы алынып, Ормуз бұғазы ашылатынын хабарлады. Сондай-ақ ол жұма күні, яғни 19 маусымда келісімге қол қойылып, бұғаз ашылғаннан кейін минасыздандыру жұмыстары жүргізілетінін, нәтижесінде мұнай екі бағытта да қайта тасымалдана бастайтынын атап өтті.
