Тоғызқұмалақ тақтасы 2 млн 628 мың теңгеге ғарышқа ұшқан
Дүниежүізілік көшпенділер ойыны қарсаңында Туризм және спорт министрлігі тоғызқұмалақ тақтасының ғарышқа ұшып барып келгенін хабарлаған болатын. NEGE порталы министрлікке ресми сауал жолдап, «ғарыш сапарының» құнын сұрады.
«Тақта 9 қыркүйек күні ғарышқа ұшып кеткен, миссиясы аяқталған соң жерге қайта оралды. Бұл ерекше оқиға, өйткені тоғызқұмалақ – ғарышта болып келген тұңғыш ұлттық ойынымыз», – деген министрлік.
Біз іле-шала Туризм және спорт министрлігіне ресми сауал жолдап, тоғызқұмалақ тақтасын ғарышқа ұшырудың құны қанша болғанын, «Роскосмоспен» қалай келіскенін, ақшаны қайдан алғанын, идея кімдікі екенін және Дүниежүзілік көшпенділер ойынының жалпы бюджеті қанша болғанын сұрағанбыз. Жуырда министрдің орынбасары С.Жарасбаевтан төмендегідей жауап келді:
«Қазақстан Республикасы Туризм және спорт министрлігі Сіздің сұрауыңыз бойынша келесіні хабарлайды.
Тоғызқұмалақ тақтасын ғарышқа жіберу үшін «Тоғызқұмалақ федерациясы» ЗТБ Ресей ғарыш агенттігінің «Стратонавтика оператор стратосферных полетов» қосалқы мердігер компаниясымен келіссөздер жүргізіп жүзеге асырды.
Тоғызқұмалақ тақтасын ғарышқа апарып келу үшін «Жаңа пост» компаниясының демеушілігімен 2 628 000 (екі миллион алты жүз жиырма сегіз мың) теңге жұмсалды.
Тақтаны ғарышқа жіберу идеясы тоғызқұмалақ федерациясының бастамасымен жүзеге асты.
5-Дүниежүзілік көшпенділер ойындарының жалпы бюджеті 7,7 млрд теңгені құрады, мемлекет бюджетінен 5,7 млрд теңге және демеушілер тарапынан 2 млрд теңге көлемінде қолдау көрсетілді».
Министрлік «ғарышкер тақта» туралы хабарлағанда жұрт көкейінде «қанша ақша жұмсалды» деген сауал тұрды. Сауал жолдадық, жауап алдық. Енді бұл идеяның қаншалықты ұтымды болғанын өзіңіз саралап көріңіз...
