«Тоғыз келі салмақ тастадым»: Тоқаев қандай спортпен шұғылданатынын айтты
Қасым-Жомарт Тоқаев Turkistan газетіне берген сұхбатында денсаулығына қатысты тараған қауесеттерді жоққа шығарды.
Астана, NEGE. Соңғы кезде Президенттің денсаулығына қатысты ел ішінде түрлі әңгіме тарады. Осы орайда Қасым-Жомарт Тоқаев денсаулығында кінарат жоқ екенін, тоғыз келі салмақ тастап, өзін жайлы сезініп жүргенін айтты.
«Денсаулығым жақсы, қан қысымым қалыпты. Күн сайын йогамен шұғылдануды әдетке айналдырдым, бірақ медитация жасамаймын. Бұрынғы кәсіпқой спортшымен аптасына екі рет үстел теннисін ойнаймын.
Расымен, тоғыз келі салмақ тастап, өзімді әлдеқайда жайлы сезінетін болдым», – дейді Қасым-Жомарт Тоқаев сұхбатында.
Бұған қоса ол Владимир Путин, Ильхам Әлиев, Шавкат Мирзиёев сынды ТМД елдеріндегі кейбір әріптестері де спортқа жақын екенін айта кетті.
«Таяуда Бішкекте өткен бейресми іс-шара кезінде Путин жас дзюдошыға қарсы әдемі әдіс жасап, аға буынның абыройын көтеріп тастады. Әлиев те мықты, кәнігі спортшы сияқты үнемі жаттығады, Жапаров футбол ойнайды. Мирзиёев те ширақ, ол жаттығу залында шынығады. Пашинян велосипед тебеді. Лукашенко әлі күнге дейін хоккей ойнайды екен. Кезінде теңіз-әскери күштерінде болып, әбден шыныққан Рахмонның да денсаулығы жақсы», – дейді ол.
Тоқаев әріптестерінің бәрі де бабында екенін айтты.
