Жаңалықтар 12:10, 10 Қаңтар 2023

Тікұшақ жұмылдырылды: Ұлытау облысында екі қойшы 8 күннен бері іздестіріліп жатыр

Ұлытау ауданында ТЖ департаментінің, полиция департаментінің және жергілікті атқарушы органдардың күштерімен және құралдарымен жоғалған екі қойшыны іздеу жұмысы 8 тәулікке созылды.

Алматы, NEGE. 9 қаңтарда іздеу жұмыстарына ТЖМ авиациясы жұмылдырылды. Іздестіру жүргізілген бағыт Жезқазған қаласы - "Тоба" қыстағы және "Кіші Киік" қыстағы.

Еске сала кетейік, 1964 жылы туған "Кіші Киік" қыстауының жұмысшысы 2022 жылдың 31 желтоқсанында қыстақтан белгісіз бағытта шыққан және оның орналасқан жері әлі белгісіз. Жоғалу туралы өтініш 2023 жылдың 2 қаңтарында келіп түсті, іздестіру жұмыстары 8 тәулік бойы жүргізілуде.

Сондай-ақ, 3 қаңтарда сағат 18:30-да "Тоба" қыстағының иесінен 1978 жылы туған қойшы мал іздеуге шығып, оралмады деген мәлімдеме түсті.

Екі адамды іздеу жұмыстары жалғасуда.

ТЖ департаменті қыс мезгілінде қауіпсіздік ережелерін сақтау қажеттілігі туралы ескертеді, дауылды ескертулерге назар аударыңыз және ауа-райы нашарлаған жағдайда үйде болыңыз!

Төтенше жағдай туындаған жағдайда құтқару қызметінің тәулік бойғы "112" бірыңғай нөміріне немесе "101"нөміріне қоңырау шалу керек.