Теннисші Анна Данилина Сидней турнирінің жеңімпазы атанды
Қазақстандық теннисші Анна Данилина жұптық сында Сидней WTA 500 турнирінің жеңімпазы атанды, деп хабарлайды Olympic.kz ҚТФ баспасөз қызметіне сілтеме жасап.
Алматы, NEGE. Данилина бразилиялық Беатрис Хаддад Майямен бірге соңғы бәсекеде германиялық Вивиан Хайзер - мажарстандық Панна Удвардимен бас жүлдені сарапқа салды. Бірінші партияда германиялық-мажарстандық жұп 6:4 есебімен басым болды. Екінші сетте Анна мен Беатрис брейкпен 2:0 есебімен алға шықты. Ақыры сол басымдылығын сақтай алды - 7:5. Супер тай-брейкте де олар 4:0 есебімен алға шықты. Ойын соңында әлденеше матчболды пайдалана алмағанымен, 10:8 есебімен жеңіспен тәмамдады. 1 сағат 36 минутқа созылған кездесуде қарсыластар қос-қостан брейк жасады.
Осылайша Анна Данилина жұптық сында спорттық жолында алғаш рет WTA 500 жарысының чемпионы атанды. Енді ол Аустралия ашық чемпионатында бақ сынайды.
