Темірлан Анарбековтің сейві үздік ондыққа енді
UEFA-ның әлеуметтік желідегі ресми парақшасында Чемпиондар лигасының негізгі кезеңіндегі қақпашылардың үздік он сейвінің тізімі жарияланды. Үздік сейв жасаған қақпашылар қатарында «Қайрат» ойыншысы Темірлан Анарбековтің де есімі аталды.
Астана, NEGE. Мамандар Анарбековтің Данияның «Копенгаген» клубына қарсы кездесудегі сейвін жоғары бағалаған. Сол сәтте ол қарсыластың қақпа бұрышына бағыттаған күшті соққысына тойтарыс берген еді.
Бұл тізімде «Спортинг» ойыншысы Руи Силваның «Ювентусқа» қарсы матчта жасаған сейві көш бастап тұр. Одан кейін «Арсенал» ойыншысы Давид Райяның «Олимпиакосқа» қарсы ойындағы, сондай-ақ «Тоттенхэм» ойыншысы Гильермо Викарионың «Монакоға» қарсы кездесудегі сейвтері үздік үштікке енген.
Айта кетейік, 22 жастағы Темірлан Анарбеков УЕФА-ның ресми рейтингі бойынша Чемпиондар лигасының алты матчында 36 сейв жасаған.
