Темірлан Анарбековтің мансабына қатысты жаңалық айтылды
Алматылық «Қайрат» пен Қазақстан футбол құрамасының қақпашысы Темірлан Анарбеков клубпен жаңа келісімшартқа отырды.
Астана, NEGE. Бұл туралы клубтың баспасөз қызметі хабарлады.
Келісімшарт 2028 жылға дейін есептелген.
«Темірлан Анарбеков «Қайратпен» келісімшартты ұзартты. Жаңа келісім 2028 жылдың 30 қарашасына дейін есептелген», – делінген клубтың желідегі ресми парақшасында.
Осылайша, еуропалық клубтардың біріне ауысуы мүмкін деген қауесетке қарамастан, Анарбеков әзірге «Қайрат» командасында қалатын болды.
Айта кетсек, «Қайраттың» 22 жастағы қақпашысы Чемпиондар лигасының плей-офф кезеңінде ерекше көзге түскен еді. Ол кезде қақпашы «Селтиктің» пенальти сериясында үш допты қайтарды.