Таяу Шығыстағы жағдайға байланысты мұнай бағасы күрт өсті
Мұнай бағасы жыл басынан бергі ең жоғарғы көрсеткішке жетті.
Астана, NEGE. Трейдерлер АҚШ пен Израильдің Иранға қарсы әскери іс-қимылдарынан Ормуз бұғазының іс жүзінде жабылуы салдарын бағалап жатыр, деп хабарлайды Bloomberg.
Brent маркалы мұнай шамамен 6%-ға қымбаттап, барреліне 77 доллар деңгейінде тұрақтады. Бұған дейін сауда барысында баға 13%-ға дейін өсіп, 2025 жылдың қаңтарынан бергі ең жоғары деңгейге жетті.
Иран жағалауындағы әлемдік мұнайдың бестен бір бөлігі мен ірі көлемдегі газ тасымалданатын стратегиялық өткел – Ормуз бұғазы арқылы танкерлер қозғалысы негізінен тоқтады. Қақтығыс ушығып жатқандықтан, кеме иелері мен трейдерлер өз еркімен тасымалды уақытша тоқтатқан. Сарапшылардың болжамынша, егер бұғаз толық жабылса, мұнай бағасы барреліне 100 доллардан асып кетуі мүмкін.
Қазіргі уақытта Ормуз бұғазы ресми түрде жабылған жоқ, алайда үш танкерге шабуыл жасалғаны туралы ақпарат тарады.