Тасмағамбетов, Нығматулин, Көшербаев: Досхан Жолжақсыновтың мерейтойында бұрынғы шенеуніктер бой көрсетті
Алматыда Қазақстанның халық әртісі, көрнекті актер әрі режиссер Досхан Жолжақсыновтың 75 жас мерейтойы аталып өтті.
Астана, NEGE. Мерейтойға мемлекет және қоғам қайраткерлері, бұрынғы лауазымды тұлғалар мен ақын-жазушылар шақырылған. Салтанатты шарада бас қосқан танымал қонақтар актерді мерейтойымен құттықтап, жылы лебіздерін білдірді.
Видеодан кадр/qazaqfilm.kz/instagram.com
Желіде тараған видеолардан қонақтар арасында Қазақстанның Ресейдегі бұрынғы елшісі Иманғали Тасмағамбетов, бұрынғы мемлекеттік хатшы Қырымбек Көшербаев, Мәжілістің бұрынғы төрағасы Нұрлан Нығматулин мен оның сыңары Ерлан Нығматулин, бұрынғы сенатор Қуаныш Сұлтанов, Президенттің бұрынғы көмекшісі Тамара Дүйсенова және Алматы облысының бұрынғы әкімі Амандық Баталовтың болғанын аңғарамыз. 
Видеодан кадр/nshaxarbaeva/instagram.com
Әсіресе, бұрынғы Мәжіліс спикері Нұрлан Нығматулин ел назарын аударды. Өйткені ол 2022 жылы қызметінен босатылғаннан кейін көпшілік алдына көп шыға қоймаған еді.
БАҚ мәліметінше, Досхан Жолжақсынов пен Ерлан Нығматулин бір-біріне құда болып келеді. Актердің ұлы Біржан кәсіпкердің қызына үйленген.
Мерейтой иесін мәдениет және ақпарат министрі Арман Қырықбаев та құттықтады. «Қазақфильм» киностудиясының президенті міндетін атқарушы Айдар Омаров министрдің құттықтау хатын оқып, оның атынан актердің иығына шапан жапты.