Тәртіп бұзушылар әкімшілік жаза ретінде қоғамдық жұмыстарға тартылуы мүмкін
Мәжіліс Әкімшілік құқық бұзушылық туралы кодекске енгізілетін түзетулерді екінші оқылымда қабылдады.
Алматы, NEGE. Заң әкімшілік-деликтік заңнаманы одан әрі жетілдіруге бағытталған. 2024 жылдың 17 сәуірінде заң бірінші оқылымнан өткен еді.
Әкімшілік құқық бұзушылық туралы кодекске қоғамдық жұмыстарға тарту түріндегі әкімшілік жаза енгізіледі. Екінші оқылымға дайындық барысында депутаттардың бастамасымен оны іске асыру тетігі айтарлықтай жетілдіріліп, қоғамдық жұмыстардан жалтару жағдайларындағы ішкі істер органдарының рөлі күшейтілді.
Заң әкімшілік құқық бұзушылық туралы істерді қарау кезінде көлік құралын пайдалануды реттейді. Іс қысқартылған тәртіпте жүргізілсе, қайта ашылған мән-жайлар бойынша істерді қайта қарау тәртібін құқықтық реттеудегі олқылықтар жойылады. Президент жанындағы Құқық қорғау және сот жүйелерін реформалау жөніндегі комиссия әзірлеген және Мемлекет басшысы бекіткен түзетулер жүзеге асырылады.
Төтенше жағдай режимінде ӘҚБтК-те әкімшілік құқық бұзушылық істер бойынша ерекше іс жүргізу тәртібінің болмауына және соттың (лауазымды тұлғалардың) істерді қарау мерзімдерін тоқтата тұру құқығына қатысты олқылықтарды жоюға бағытталған заңнамалық шаралар қабылданады.
Сонымен қатар депутаттар ӘҚБтК-нің 79-бабында операторлар мен электронды ақпараттық ресурстардың иелеріне жеке деректерді қорғау және оларды пайдалануға қатысты заңнаманы бұзғаны үшін айыппұл санкцияларын қатаңдатуға бағытталған түзетулер енгізді. Басқа заңдар мен кодекстердің нормаларында болуына және оларды қолдану орынсыз деп танылуына байланысты ӘҚБтК-нің 85 және 100-баптары алынып тасталды. Бұдан бөлек басқа да бірқатар норма енгізілді.