Танымал адвокат Жанна Оразбақованың үстінен іс қозғалды
Салтанат Нүкенованың мүддесін қорғаған адвокат Жанна Оразбақованың үстінен қылмыстық іс қозғалғаны жайлы ақпарат тарады.
Алматы, NEGE. Ақпаратты Алматы қалалық полиция департаменті растады.
«Қылмыстық іс жүргізу заңнамасында белгіленген тыйымға қарамастан, көрсетілген тұлғалар БАҚ және әлеуметтік желілер арқылы тергеу барысы туралы ақпарат таратқан», – делінген полицияның ресми мәлімдемесінде.
Адвокат Жанна Оразбақова өзінің үстінен қозғалған қылмыстық іске қатысты пікір білдірді.
«Алматы қаласы полиция департаментінің маған қарсы қозғаған қылмыстық ісі заңсыз, себебі мен іс материалдарын көрген жоқпын, таныс емеспін, оларды қалай жария ете аламын? Тергеу әлі жалғасуда. Ең бастысы, мен сотқа дейінгі тергеп-тексеру құпиясын жарияламау туралы ешқандай міндеттеме алған жоқпын және бұл міндеттемесіз ешкім маған айып таға алмайды. Қазір қылмыстық істі заңсыз тіркегені туралы прокуратураға арыз дайындап жатырмыз. Сіздерді хабардар етіп отырамын», – делінген Жанна Оразбақованың жазбасында.