Талғарда қылмыстық істі тоқтату үшін тегін демалмақ болған екі полицей ұсталды
2 қыркүйекте ҰҚК Сыбайлас жемқорлыққа қарсы іс-қимыл қызметінің қызметкерлері облыстық полицейлермен бірлесіп, Талғар аудандық полиция басқармасының екі қызметкерін ұстады.
Астана, NEGE. Бұл жөніндегі ақпарат журналист Михаил Козачковтың Telegram-дағы арнасында жарияланды.
Тергеу мәліметінше, 31 шілдеде А. есімді азамат құқық қорғау органдарына полиция қызметкерлерінің демалыс орны қызметтерін тегін көрсетуді талап еткеніне қатысты шағымданған. Атап айтқанда, олар кіру билеттерін, мейрамхана қызметін және тұруға арналған үйлерді ақысыз беруді сұраған. Бұл қызметтерді полицейлер демалыс кешені аумағында клиенттің жарақат алуына байланысты қозғалған қылмыстық істі тоқтату үшін сыйақы ретінде талап еткені айтылады.
Алайда аталған қылмыстық іс расымен тіркелгенімен, 27 шілдеде қылмыстық құқық бұзушылық құрамының болмауына байланысты тоқтатылғаны анықталған.
Қазіргі уақытта полиция қызметкерлерінің жұмыс орындарында тінту жүргізіліп, сотқа дейінгі тергеп-тексеру басталды.