Талғарда ер адамды өлтіріп, 2 жасар қызды ұрлап кеткен күдікті қолға түсті
Ішкі істер министрлігі Талғарда ер адамды атып өлтіріп, 2 жасар қызды ұрлау ісі бойынша ресми пікір білдіріді. Олар күдіктінің қамауға алынғанын мәлімдеді.
Алматы, NEGE. Министрлік адамды өлтіру және кәмелетке толмаған баланы ұрлау фактілері бойынша қылмыстық іс қозғалғанын хабарлады.
Тергеу мәліметінше, күдікті мен жәбірленуші бұрын жақын қарым-қатынаста болған.
«Олардың арасында жанжал туындап, күдікті жәбірленушінің ағасына оқ атқан. Ер адам оқиға орнында көз жұмды. Қылмыс жасалған соң күдікті кәмелетке толмаған баланы ұрлап қашып кеткен. Күдіктінің жеке басы мен орналасқан жері анықталды. Ол қамауға алынып, қылмыс құралы шолақ мылтық тәркіленді», – делінген хабарламада.
Қыз анасына табысталды. Оны дәрігерлер тексеріп жатыр. Ал кейінірек адвокат Гауһар Сариев баланың көліктен табылғанын, ал күдіктінің таудан ұсталғанын хабарлады.
