Талғар қаласында өрттен үш адам көз жұмды
Алматы облысының төтенше жағдайлар департаментіне 10 қараша сағат 03:40-та Талғар қаласында жеке сектордағы үйдің өртенгені туралы хабарлама түскен.
Алматы, NEGE. Оқиға орнына Талғар қаласындағы №2 мамандандырылған өрт сөндіру бөлімінің 6 қызметкері мен 2 бірлік техникасы дереу жіберілді. Бұл туралы ҚР ТЖМ ресми өкілі Талғат Уәли хабарлады. «Өрт сөндірушілер шақырту орнына келген кезде тұрғын үй (көлемі 5х8) толығымен өртке оранған. Сондай-ақ үй төбесінің жабындысы құлағаны анықталды. Өрт сөндіру барысында оқиға орнынан 2012, 2001 және 1976 жылдары туған үш адамның денесі табылды. Өрт сағат 04:06-да оқшауланып, сағат 04:50-де толығымен сөндірілді. Көлемі 40 шаршы метрді құрады», - делінген ТЖМ хабарламасында. Қазіргі уақытта өрттің тұтану себептері анықталуда.