Талдықорғандағы атышулы іс: Айзат Жұманованың соңғы сәттерінің видеосы жарияланды

Алматы, NEGE. Бүгінгі сот отырысында марқұм Айзат Жұманованың ауруханаға жеткізілген сәті түсірілген видео көрсетілді. Видеодан Айзатты күйеуі Айбар Жанболаттың ауруханаға ауыр жағдайда әкелгенін көруге болады.

Алдыңғы сот отырысында куәлік еткен облыстық аурухана реаниматологы Мақсат Серікқанұлы Айзат Жұманованың реанимацияға өлім ауызында келгенін айтқан еді.

«Протоколды тіркеген кезде науқастың бірнеше жарақаты бар екенін көрсеттім. Реанимациялық бөліміне науқастар ауыр немесе аса ауыр жағдайда түседі», – деген еді дәрігер.

• Тақырыпқа орай: Прокурор: Айзат Жұманованың денесінен сүйрету іздері де, жүктілік белгілері де табылмады

Айзат Жұманова сағат 02:35-те ауруханаға жеткізілген. Қабылданған реанимациялық шараларға қарамастан, сағат 03:05-те өлімі тіркелген.

Сондай-ақ бүгін Айзат Жұманованың өліміне күдікті деп танылған күйеуі Айбар Жанболаттан жауап алынды. Ол марқұм жұбайының ата-анасынан кешірім сұрағанымен, өзіне тағылған айыпты мойындамайтынын айтты.