Талдықорғанда үш жасар баласын аяусыз ұрып-соққан әке ұсталды
Желіде денесі соққыдан көгеріп қалған кішкентай қызды дәрігерлер қарап жатқан сәт түсірілген видео жарияланды.
Астана, NEGE. Видео авторларының мәлімдеуінше, бүлдіршін мен оның анасын әкесі аяусыз соққыға жыққан.
«Талдықорғанда әкесі кішкентай баласы мен әйелін аяусыз ұрып-соққан. Қазір екеуі де облыстық ауруханада жатыр», – делінген жазбада.
Полицейлер бұл жайт бойынша «Денсаулыққа қасақана ауыр зиян келтіру» бабымен қылмыстық іс қозғалғанын хабарлады. Күдікті ұсталған сәтте масаң күйде болған.
«2 ақпан күні сағат 21:00-де "102" арнасына медициналық мекемеден үш жасар баланың зорлық-зомбылық белгілері бар дене жарақаттарымен жеткізілгені туралы хабарлама түсті.
Полиция қызметкерлері баланың әкесін тұрғылықты мекенжайы бойынша алкогольдік масаң күйде ұстап, уақытша ұстау изоляторына қамады», – деп мәлімдеді Жетісу облыстық полиция департаменті бастығының орынбасары Руслан Чарапиев.
Оның айтуынша, қазіргі уақытта анасымен бірге ауруханада жатқан балаға қажетті медициналық көмек көрсетіліп жатыр.
Сондай-ақ, полицейлер оқиғаның мән-жайын анықтау мақсатында тергеу шаралары жүргізіліп жатқанын атап өтті. Сотқа дейінгі тергеп-тексеру барысын Полиция департаменті басшылығы жеке бақылауына алды.
