Талдықорғанда мемлекетаралық іздеуде жүрген шетелдік ұсталды
Жетісу облысы полиция департаменті экстремизмге қарсы іс-қимыл басқармасының қызметкерлері ҚР ІІМ экстремизмге қарсы іс-қимыл департаментінің және ҚР ҚАЖК-нің үйлестіруімен мемлекетаралық іздеуде жүрген шетелдік азаматты ұстады, деп хабарлайды Polisia.kz.
Алматы, NEGE. Ұсталған шетелдік Қылмыстық кодекске сәйкес иемдену немесе жымқыру арқылы ұрлық жасады деген айыппен өз елінде іздеуде жүрген 20 жастағы ер адам екені анықталды. Соттан жалтарған азамат 2023 жылдың 29 желтоқсанында Ташкент облысының бас ішкі істер басқармасы іздеуге жариялаған.
Ол іздеу жарияланғанын білген соң Өзбекстаннан кетіп, Қазақстанға келген, Шымкент қаласында жасырынып, наубайшы болып жұмысқа орналасуға шешім қабылдаған. Алайда көп ұзамай, осы жылы ол Талдықорғанға көшіп келіп, аспаздың көмекшісі болып жұмысқа орналасқан.
Жедел деректер бойынша іздеуде жүрген адам Талдықорғанда ұсталып, қамауға алынды. Қазіргі уақытта мүдделі мемлекеттік органдармен бірлесіп, оны Өзбекстанға экстрадициялау туралы мәселе қаралуда, онда ол сот алдында жауап береді.
