Таиландта Қазақстанның сегіз азаматы мінген катер суға батып кетті
11 қаңтар күні Пхукетте туристер мінген катер апатқа ұшырады. Катерде Қазақстанның сегіз азаматы болған.
Астана, NEGE. БАҚ мәліметінше, Korawich Marine 888 Андаман теңізінде балық аулайтын кемемен соқтығысқан. Катерде барлығы 55 адам болған.
Еліміздің Сыртқы істер министрлігі апатқа ұшыраған катердегі сегіз қазақстандықтың үшеуі ауруханаға түскенін хабарлады.
«Қайықта Қазақстанның 8 азаматы болған. Барлық зардап шеккендерге медициналық көмек көрсетілді. Қазіргі уақытта Қазақстанның 3 азаматы ауруханаға жатқызылып, дәрігерлердің бақылауында, олардың жағдайы тұрақты деп бағалануда, шығынды сақтандыру компаниясы өтеп жатыр», – деп хабарлады СІМ өкілі.
Ведомство мәліметінше, консул азаматтармен тұрақты байланыс орнатып, қажетті қолдау көрсетіп отыр.
