Сүйіктісін соққыға жыққан: Танымал медиакомпания актер Шәріп Серікті фильмдерден алып тастады
Алматы, NEGE. Бұл туралы Әлия Бөтеева Instagram парақшасында жазып, видео жариялады. Әлия Бөтеева жариялаған бейнежазбада актердің қызды лифтіден сүйрепп шығарғаны анық көрінеді.
«Физикалық жағынан әлсіз болсам да, мораль тұрғысынан қабылдауға болмайтын нәрсені айтпай, үндемей қоя салатындай әлсіз адам емеспін. Мен өзімді және өз абыройымды қорғауға мәжбүрмін. Менің ойымша, кесіп өтуге болмайтын шекаралар болады. Егер мен бұл фотолар мен видеоны жарияламасам, ең алдымен өзімді және отбасымды сатқан боламын. Мен өзімді және ар-намысымды қорғауға мәжбүрмін. Мұндай жағдайды басынан өткергендердің бәрінен бұл жағдай қалыпты емес екенін түсінуін сұрағым келеді. Шынайы сенім мен махаббаттан басталған нәрсенің осындай жағдайға айналғаны өкінішті-ақ. Осы жазбаммен айтқым келетін жалғыз нәрсе: өкінішке қарай, мен дереу арыз жазуым қажет еді, бірден қарсы шығып, шыдамауым керек еді. Қатты шошығаным сонша не болғанын аңғарып үлгере алмай қалдым», – деп жазды Әлия Бөтеева.
Алматы қалалық Полиция департаменті аталған дерек бойынша тергеу басталғанын мәлімдеді.
«Тергеу амалдары жүргізіліп жатыр. Оқиғаның болған орны мен уақытын қоса алғанда, объективті мән-жайлар анықталып, Қазақстан Республикасының заңнамасына сәйкес шаралар қабылданатын болады», – деп хабарлады ведомстводан.
Сонымен қатар, Sәlem Entertainment компаниясы актер Шәріп Серікті «қара тізімге» қосып, фильмдерден алып тастады.
«Соңғы оқиғаларға байланысты, Sәlem Entertainment ұжымы Шәрип Серікті «қара тізімге» енгізіп, онымен кез келген ынтымақтастықты толығымен тоқтатты. Бұған дейін жарияланған «Шакал» сериалы мен «Qarga» сериалының үшінші маусымы ресми түрде жабылды. Сонымен қатар, актер «Meow» сериалының екінші маусымында басты рөлдердің бірін сомдауы тиіс болған, алайда ол жобадан толықтай алынды», – деп жазды компания желідегі ресми парақшасында.
