Су тасқынымен күреске 7000-нан астам адам жұмылдырылды
Еліміздің солтүстік және батыс өңірлеріне айтарлықтай зардабын тигізген су тасқынына қарсы іс-шараларға жалпы саны 7000-нан астам адам жұмылдырылған. Бұл туралы бүгінгі Үкімет отырысында вице-Премьер Қанат Бозымбаев жария етті.
Астана, NEGE. «Су тасқынына қарсы іс-шараларды жүргізуге 7000-нан астам адам, 1900 техника, оның ішінде 6 әуе көлігі жұмылдырылды. Төтенше жағдайлар министрлігі, полиция, Ұлттық ұлан, Қорғаныс министрлігі мен жергілікті атқарушы органдардың күштері мен құралдары тартылды. Сондай-ақ жеке ұйымдар мен еріктілер қатысты», деді Қанат Алдабергенұлы.
Қ.Бозымбаев су басқан аймақтардан осы күнге дейін 119 000-нан астам адам эвакуацияланғанын хабарлады. Оның 44 мыңы балалар.
«Бүгінгі таңда өз үйіне 55 600 адам оралды. Эвакуациялық пунктерде шамамен 5000 адам қалды, туыстарын уақытша паналап жүргендер 58 000-нан астам», деді Үкімет басшысының орынбасары Қ.Бозымбаев.
Сағадат БАҚЫТБЕК
