СryptoCity: Жаңа пилоттық жоба жүзеге асырылады
Мемлекет басшысының Астана халықаралық форумының пленарлық отырысындағы сөз сөйлееді, деп хабарлады Ақорда.
Астана, NEGE. Президент Қасым-Жомарт Тоқаев Қазақстанда CryptoCity деп аталатын пилоттық жобаның құрылатынын жариялады. Бұл жобада криптовалюталарды заңды түрде тауарлар, қызметтер сатып алуға және басқа да мақсатта пайдалануға болады.
«Біз адам капиталына инвестиция салып, жас мамандардың қалыптасуына жағдай жасаймыз. Ең басты міндетіміз – аймақтар арасындағы алшақтықты азайту және орта тапты нығайту. Сол себепті цифрлық технология мен жасанды интеллектіден бастап жасыл энергетика мен қосымша құны жоғары өндіріске дейінгі негізгі секторлардағы әлеуетімізді күшейте береміз.
Біз цифрлық трансформацияда елеулі табысқа қол жеткіздік. Мақсатымыз – Еуразиядағы жетекші IT хабқа айналу. Әсіресе, жасанды интеллектіні дамытуға айрықша мән беріп отырмыз. Бірқатар шетелдік университеттің филиалы бар, зерттеу мен әзірлеу саласындағы серіктестік жолға қойылған академиялық және инновациялық хабқа айналғымыз келеді. Қазақстан ең қуатты суперкомпьютерді іске қосуға кірісті. Қазірдің өзінде бұл жұмыс басталып кетті.
Бұдан бөлек, СryptoCity деп аталатын жаңа пилоттық жобаны жүзеге асыруды жоспарлап отырмыз. Мұнда криптовалютаны азық-түлік сатып алуға, қызмет төлеміне және басқа да мақсаттарда пайдалануға жағдай жасалады» – деді Қасым-Жомарт Тоқаев.
