Қазақстан құрамасы турнирді жеңіспен бастады

Алматы, NEGE. Футболдан 21 жасқа дейінгі Қазақстан жастар құрамасы Түркияда өтіп жатқан Antalya Cup-2021 халықаралық турнирінде алғашқы ойынды Солтүстік Македония жастарына қарсы өткізді. Қазақстандық жастарға белгілі маман Қайрат Нұрдәулетов жетекшілік етеді.

Құрамамыз аталған турнирде үш ойын өткізеді. Бүгінгі кездесуде олар жинақы қимыл көрсетті. Нәтижесінде қарсыластар қақпасы маңында жиі шабуылдады. Қазақстандықтар 56, 73-минуттарда гол соқса, оған қарсыластар 80-минутта бір голмен жауап қайырды. Қорытындысында Қазақстан құрамасы Солтүстік Македонияны 2:1 есебімен тізе бүктірді.

Енді ел спортшылары екі кездесу өткізеді. Алдымен 26 наурызда Болгария жастарымен сынға түссе, одан кейін 29 наурызда Өзбекстан құрамасымен шеберлік байқасады.