Сот Тұрлыхановтың ұлының жазасын жеңілдету туралы өтінішін қанағаттандырмады
Алматы облысы Алатау қаласының соты депутат Дәулет Тұрлыхановтың ұлы, ерлі-зайыпты адвокаттарды соққыға жыққаны үшін колонияда жазасын өтеп жатқан Нұрасыл Болаттың өтінішін қарады. Ол қалған мерзімді жазаның жеңіл түріне ауыстыруды сұраған болатын.
Алматы, NEGE. Прокурор мен жәбірленуші Анна Чернова өтінішті ішінара қанағаттандырып, жазаны бостандықты шектеуге алмастыруды ұсынған.
Алайда сот бұл өтінішті қанағаттандырмады. Бұған Нұрасыл Болаттың бұрын пробациялық бақылау талаптарын бірнеше рет бұзғаны себеп болған. Атап айтқанда, ол түнде қоғамдық орында жүрген, мейрамхана мен ойын-сауық орнына барған.
«Өтініш пен іс материалдарындағы деректер сотталған Н.Болаттың мінез-құлқында оң өзгерістердің бар екенін растамады, ол өзінің түзелгенін дәлелдеген жоқ. Сондықтан жаза өтеу жалғасын табуы тиіс», – делінген соттың баспасөз қызметі таратқан хабарламада.
Сот қаулысы әлі заңды күшіне енген жоқ.
