Сорбұлақта жоғалған тікұшақты іздеу тәулік бойы жалғасуда

АЛМАТЫ, NEGE. Іздестіру жұмыстарына шамамен 400 адам, 70-тен астам техника, 21 жүзу құралы, 10 дрон, эхолоттар, суасты барлау құрылғылары мен кинологиялық топтар жұмылдырылған. Операцияға Әуе қорғанысы күштерінің қолбасшысы, авиация генерал-майоры Асқар Ізбасов жетекшілік етуде.

Жұмылдырылған күштер:

Қорғаныс министрлігі: 193 әскери қызметкер, 25 техника, 8 жүзу құралы, 4 дрон.

ТЖМ: 87 адам, 22 техника, 10 жүзу құралы, 7 дрон, 2 эхолот, сүңгуірлер мен 2 кинологиялық топ.

ІІМ: 102 қызметкер, 30 техника.

Әкімдік: 2 автокөлік, 3 жүзу құралы.

Су қоймасының акваториясы мен жағалауы, соның ішінде қиын жететін және терең аймақтар толық тексерілуде. Жоғалғандардың туыстарына іздеу барысы жайлы тұрақты ақпарат беріліп отыр.

Сорбұлақ су қоймасы — ТМД-дағы ең ірі және әлемдегі ірі техногендік су айдындарының бірі. Оның күрделі суасты бедері, лайлы түбі және 22 метрге жететін тереңдігі іздеу жұмыстарына кедергі келтіруде.

ТЖМ мәліметінше, құтқарушылар тікұшақтың кейбір бөлшектерін тапқан.

Іздестіру операциясы нақты нәтижеге жеткенге дейін жалғасады.