Солтүстік Қазақстан облысында су тасқынына қарсы іс-шаралар күшейтілді
Солтүстік Қазақстан облысының Қызылжар ауданына қарасты Тепличное, Заречное, Ольшанка және Большая Малышка ауылдарында Есіл өзенінің су деңгейінің көтерілуіне байланысты алдын алу шаралары қарқынды жүргізілуде.
Алматы, NEGE. Тұрғын үйлерді су басу қаупінің алдын алу мақсатында қорғаныс бөгеттері нығайтылып жатыр.
Құтқару жұмыстарына барлығы 1087 адам, 126 бірлік төтенше жағдайлар министрлігінің (ТЖМ), полиция департаментінің (ПД), жергілікті атқарушы органдардың (ЖАО) және ТЖМ-нің әскери бөлімдерінің техникасы жұмылдырылды. Тәулігіне 4000 дана, жалпы саны 110 980 қапшық дайындалып, төселді.
Заречное ауылында су басу қаупін төмендету үшін тәулігіне 1500 текше метрден астам су айдау жұмыстары жүргізілуде. Бүгінгі күнге дейін барлығы 79 200 текше метр су сорылып шығарылды.
Бұған қоса, Қызылжар ауданының Вагулино және Соколовка ауылдарындағы су тасқыны жағдайына тұрақты мониторинг жүргізілуде. Эвакуациялық пункттер дайындалып, қажетті шаралар қабылданды.