Tesla Education-нен зардап шеккен балалар өзге білім орталықтарында тегін оқиды
Tesla Education орталығындағы дауға тап болған балалар өзге білім орталықтарында тегін оқуды жалғастырады. Бұл туралы Respublica партиясы мәлімдеді.
Астана, NEGE. Енді олар «Пифагор», «JUZ40», «Самға», «Достық», «Зерделі» және басқа да орталықтарда білім алуды жалғастырады.
Мәжіліс депутаты Олжас Құспеков аталған білім орталықтарымен ортақ мәміле жасалғанын мәлімдеді. Ал шығынға ұшыраған отбасылардың балаларын оқу орталықтары өзара бөліп, ҰБТ-ға және басқа да пәндер бойынша тегін дайындауды мойнына алды.
Қазірдің өзінде «Зерделі», «Пифагор» және «JUZ40» орталықтары дайын екенін растаған. Ол үшін ата-ананың төлем жасағанын дәлелдейтін түбіртек қана қажет.
Айта кетейік, бұған дейін Tesla Education білім орталығында ата-аналар сабақтардың тоқтатылуын, мұғалімдердің болмауын, сондай-ақ, орталық қызметкерлері байланысқа шықпай қоятынын айтып шағымданды. Төлем жасаған 700-ден астам отбасы өз ақшаларын қайтара алмай жүргенін айтқан.