«Әйелін сүйген еркек ешқашан сатқындық жасамайды» – Рано Омарова

– Желідегі жұрт Рано жыл өткен сайын жасарып барады дегенді айтады. Оның сыры неде?

– Біріншіден, менің генім сондай болса керек. Екіншіден, сымбатымды қалыпты жағдайда ұстап тұру үшін жаттығу залына барып, спортпен айналысамын. Кешкі уақытта жаяу жүруге және дұрыс тамақтануға тырысамын. Сондай-ақ кез келген жағдайда позитивті тұрғыда ойлап, әр нәрседен жақсылықтың нышанын көруге әдеттенгенмін. Организмге қажетті дәрумендерді де қалыс қалдырмаймын.

– Шоу-бизнестің қазіргі келбеті қандай?

– Біздегі шоу-бизнес бір орында тұрақтап қалған жоқ, жан-жақты даму үстінде. Жаңадан шығып жатқан жастар да түрлі бағытта әндер жазып, ән өнерін түрлендіруге ат салысып жатыр. Тіпті көршілес Ресейде де қазақстандық өнерпаздар табысты жұмыс істеп, өзіндік қолтаңбасын қалыптастырған. Ел ішіндегі Садраддин, Мирас Жүгінісов сияқты жігіттердің салған заманауи әндері, көңіл қуантады.

– Әдемі дауыс па, әлде әдемі қыз ба: қазір қайсысына сұраныс көп?

– Екеуі бір-бірін толықтырып отыратын дүние ғой. Бірақ сондай сұлу бола тұрып, әнді жақсы айта алмаса, шығармашылықта өміршеңдігі болмайтыны анық. Түр-сипаты келіспесе де, талантының арқасында топ жарған қыздар бар. Мысалы, Адель есімді америкалық әншінің дауысы болғанымен, сыртқы тұрпаты келіспегені белгілі. Кейін өзін қолына алғанның арқасында жіптіктей түзу қыз болып шыға келді. Барлығы адамның алға қойған мақсатына байланысты ғой. Әдемі дауыспен де, әдемі түрмен де жетістікке жететіндер бар. Бастысы, адамның өзіне деген сенімінде.

– Сіздің әкеңіздің ұлты ұйғыр болғанымен, төлқұжатта қазақ деп жазылған екенсіз. Сол сияқты «All Давай» тобында өнер көрсеткен ағаңыз Шухрат та есімін Шоқан деп өзгертті. Неге?

– Біздің әкеміз өмірден ерте өткендіктен ағам екеуіміз көбінесе нағашыларымыздың қолында болдық. Мені олар Раушан десе, Шухратты Шоқан дейтін. Есейгенде мен өз атымда қалуды жөн көрсем, ол нағашылары атаған есімді таңдауды ұйғарды.

– Қаржы министрлігі енді әншілер той мен жиын-шараларда тапқан табысынан салық төлеуге міндетелетінін айты. Бұл дұрыс па? 

– Егер әлемдік тәжірибеге ден қоя бастасақ, онда салық төлеуден жалтармауға тиіспіз. Мен оны құптаймын. Бірақ соған сай еңбекақының да өскені жөн болар. Осы ретте қарапайым халықпен бірге әртістерде тапқан табысынан салық төлегені абзал.

– Көзге шөп салудың құрбаны болғаныңызды айттыңыз. Сатқындық үшін отбсын бұзатын жандарға не айтасыз?

– Бір білетінім, егер ер адам әйелін сүйсе, оған ешқашан сатқындық жасамайды. Әркімнің басында әрқандай жағдай болады ғой. Бірақ сатқындық жалғаса берсе, ол жан жарының көңіліне кірбің түсіріп, жанына жазылмас жара салады. Ерте ме, кеш пе жолдары екі жаққа айырылады. Менің жағдайымда күйеуім ешқайда шығармай, жеке тұлға ретінде өсіп-өнуіме мұрша бермеді. Сондықтан жанұялық өмірге нүкте қоюыма тура келді.

– Қазір қыздардың арасында өзінен жас жігітке тұрмысқа шығу қалыпты жағдайға айналды. Сізді де мазалайтын бозбалалар бар ма? 

– Әрине бар. Жасыратыны жоқ, бұрынғы күйеуім де өзімнен бес жас кіші болған. Физиологиялық тұрғыдан алғанда, жас өткен сайын ер адамның либидосы азайса, ал әйелдікі, керісінше, арта түседі дейді. Сәйкестік содан орнайтын болар.

– Кезінде Дауыс International тобын биліктегі беделді ағалар «крышавать» етеді дегенді естуші едік. Осы рас па?

– Бұл – қауесет сөз. Бірінші рет сіздің аузыңыздан естіп отырмын.

– Жас әншілерден жабық кештерде жиі өнер көрсететінін естиміз. Ондай шараларда интимді қызмет көрсетуді ұсынатын жандар бола ма?

– Біз ән салып жүрген шақта ондай жағдаймен бетпе-бет келмедік. Өз басыма ондай ұсыныс түскен емес. Бірақ топқа продюсерлік жасаған кезде бір құрамдағы қыздың ерсі қылығын аңғардым. Топтың жетекшісі ретінде сөз өзіме келетін болғандықтан, бірден қош айтысуыма тура келді.

– Дауыс International-дің жаңа құрамын жасақтау ойда жоқ па?

– Жоқ. Әзірге жеке шығармашылықпен айналыссам деймін. Сондықтан топтың жұмысын тоқтата тұруға тура келіп тұр.