Смайылов ДДСҰ өкілдерімен темекіге бақылауды күшейту мәселесін талқылады
ҚР Премьер-министрі Әлихан Смайылов Дүниежүзілік денсаулық сақтау ұйымының Темекіге қарсы күрес жөніндегі негіздемелік конвенциясы (ДДСҰ ТКНК) Хатшылығының басшысы Адриана Бланко Маркизомен кездесу өткізді.
Алматы, NEGE. Тараптар қазақстандық заңнаманы ДДСҰ ТКНК стандарттарына үйлестіру бағытында ынтымақтастықты дамыту, сондай-ақ Қазақстанда темекіге бақылауды күшейтудің өзекті мәселелерін талқылады, делінген Үкімет басшысы баспасөз қызметінің хабарламасында.
Әлихан Смайылов азаматтардың денсаулығын нығайту мәселесі тұрақты назарда екенін атап өтті. Қазақстан Дүниежүзілік денсаулық сақтау ұйымының ратификациядан өткен Темекіге қарсы күрес жөніндегі негіздемелік конвенциясын сақтайды.
"Біздің еліміз Ұлттық заңнама деңгейінде қағидаттарды енгізе отырып, ДДСҰ міндеттемелерін орындау бағытында елеулі нәтижелерге қол жеткізді. Жүргізіліп жатқан шаралардың арқасында халықтың өмір сүру ұзақтығы артып, темекі тұтыну деңгейі төмендеді. Қазақстандықтар темекі түтіні жоқ ортаны қолдайды және темекіден бас тартқысы келетіндердің қатары көбейіп келеді", - деді Үкімет басшысы Әлихан Смайылов
Өз кезегінде Адриана Бланко Маркизо Қазақстанда халықтың денсаулығын жақсарту үшін қабылданып жатқан іс-шараларды атап өтті.
