СҚО-да жаңа ашылған қазақ сыныптарына оқушы толмай жатыр
Ауқымды үгіт-насихат жұмыстарына қарамастан қазақ тілінде оқытатын сыныптарда балалар аз.
Астана, NEGE. Солтүстік Қазақстан облыстық білім басқармасы өкілдерінің Tizgin.kz интернет-басылымына берген мәліметінше, жаңа оқу жылында облыста 6 орыс мектебінде қазақ тілінде оқытатын 0-ші және 1-сыныптар ашылған. Олар: Аққайың ауданындағы Астрахань орта мектебі, М. Жұмабаев ауданындағы Молодежное бастауыш мектебі мен Батыр Баян атындағы мектеп-гимназиясы, Петропавл қаласындағы №4, №9, №23 орта мектептер.
Дегенмен, басқарма өкілдері бұл сыныптарда бала саны аз екенін атап өтеді.
Мәселен, Петропавл қаласындағы №9 орта мектептегі қазақ тілінде оқытатын 1-сыныпта бар болғаны 6 оқушы білім алып жатса, №4 орта мектепте – 9 оқушы, № 23 орта мектепте – 7 оқушы, № 28 орта мектепте – 14 оқушы ғана.
Ал 2024-2025 оқу жылында орыс тілінде оқытатын 7 мектепте қазақ сыныптары ашылған.
Бұл ретте басқармадағылар өңірде аралас тілде оқытатын мектептер саны өсіп келе жатқанын айтады.
«Орыс тілінде оқытатын мектептер біртіндеп қазақ тілінде оқытуға ауысады: 2023-2024 оқу жылы – 105, 2024-2025 оқу жылы – 108, 2025-2026 оқу жылы – 112. Осы оқу жылында аралас мектептер саны 4 бірлікке артты», – делінген жауапта.
Айта кетейік, мемлекеттік тілде оқытатын орта білім беру ұйымдары желісін кеңейту мәселесі 2023-2029 жылдарға арналған СҚО білім беруді дамыту жөніндегі өңірлік жол картасына енгізілген.
