СҚО-да табиғи газ бағасы бір жылда 63 пайызға өскен
2026 жылдың мамыр айының қорытындысы бойынша тарату желілері арқылы жеткізілетін газдың бағасы өткен жылдың мамырымен салыстырғанда 15%-ға қымбаттаған. Баға өсімі бір жыл бұрын да байқалған.
Астана, NEGE. Energyprom сарапшыларының мәліметінше, биыл газ бағасының ең жоғары өсімі Солтүстік Қазақстан облысында тіркелген. Мұнда баға өткен жылдың мамырымен салыстырғанда бірден 63%-ға көтерілген.
Сондай-ақ Атырау облысында баға 43%-ға, Қызылорда облысында 21%-ға өсті. Бірқатар өңірде қымбаттау қарқыны біршама төмен болған.
Бұдан бөлек сарапшылар Қазақстанда табиғи газ өндіру көлемі бірнеше жыл бойы тұрақты өсім көрсеткеннен кейін биыл айтарлықтай қысқарғанын атап өтеді.
Осы жылдың қаңтар-сәуір айларының қорытындысы бойынша елде газ тәрізді күйдегі 8 млрд текше метр табиғи газ өндірілді. Бұл өткен жылдың сәйкес кезеңімен салыстырғанда 13%-ға аз.
