Скляр Chevron басшылығымен Теңіздегі жағдайды талқылады
Премьер-министрдің бірінші орынбасары Роман Скляр Chevron басшылығымен кездесуде Теңіз кенішінде өндірістің уақытша тоқтап қалуына әкеп соқтырған жағдайларға байланысты алаңдаушылығын білдірді.
Астана, NEGE. Бұл мәселе Склярдің Chevron корпорациясы Еуразия бөлімшесінің басқарушы директоры Дерек Магнесспен кездесуінде талқыланды. Үкіметтің баспасөз қызметінің хабарлауынша, кездесуге энергетика министрі Ерлан Ақкенженов және «ҚазМұнайГаз» ҰК» АҚ басқарма төрағасы Асхат Хасенов қатысты.
Кездесу барысында тараптар мұнай-газ саласындағы екіжақты ынтымақтастықтың қазіргі жағдайы мен келешегін талқылады. Келіссөздер кезінде Қазақстан-Америка энергетикалық серіктестігінің флагманы саналатын Теңіз жобасына ерекше назар аударылды.
Қазақстандық тарап Теңіздегі жағдайға байланысты алаңдаушылығын жеткізді. Chevron компаниясының басшылығы оқиғалардың салдарын жою және мұнай өндіруді кезең-кезеңімен арттыру бойынша шаралар қабылданғанын баяндады.
«Компания басшылығы болашақта мұндай жағдайларға жол бермеу және нысандардың сенімді әрі қауіпсіз жұмысын қамтамасыз ету бойынша нақты іс-қимылдар жасалатынына сенім білдірді», – делінген хабарламада.
Еске салсақ, 18 қаңтарда Теңіз кен орнында технологиялық ақау шығып, мұнай өндіру уақытша тоқтатылды. Осы жағдайға байланысты апат себептеріне егжей-тегжейлі техникалық талдау жүргізу үшін арнайы комиссия құрылды.
