Сыртқы істер министрлігі тәліптердің Қазақстандағы форумға келуіне қатысты пікір білдірді
Сыртқы істер министрінің орынбасары Роман Василенко тәліптердің биыл жазда Астанада өтетін халықаралық форумға Қазақстанға шақырылуы туралы ақпаратқа қатысты пікір білдірді.
Алматы, NEGE. «Біріншіден, сауда-экономикалық ынтымақтастыққа баса назар аударылады. Екіншіден, қазір осы елмен және Ауғанстанда жұмыс істеп жатқан қазіргі басшылықпен барша әлем қарым-қатынасын құрып жатыр. Әрине, «Талибан» қозғалысының әйелдердің үкімет құрамында болуы, әйелдердің құқықтарын қорғауға қатысты өз уәделерін орындауына қатысты мәселе бар. Ұлттық азшылық өкілдерін билікке тартуда да сұрақтар бар. Дегенмен, «Талибан» қозғалысы негізіндегі қазіргі әкімшіліктің болуы – ол объективті түрде мойындалған факт. Ауғанстан - Орталық Азиядағы өңірлік көрші. Қазіргі кезде мұндай өзара іс-қимыл біздің мүдделерімізге сәйкес келеді», - деді министрдің орынбасары.