Щучинск қаласында дәмханада газ жарылып, 7 адам қаза тапты
Щучинск қаласында бес қабатты тұрғын үйге жапсарлас салынған бір қабатты кафеде газ-ауа қоспасы жарылып, кейін өрт шықты.
Астана, NEGE. Өрт сөндірушілер отқа оранған ғимараттан 8 газ баллонын алып шығып, 10-нан астам адамды құтқарды.
Облыс әкімдігінің мәліметінше, барлығы 26 адам зардап шеккен. Оның ішінде 7 адам қаза тапты (олардың бірі – 16 жастағы қыз). 13 адам Бурабай аудандық ауруханасына жеткізілді. 6 адам амбулаториялық бақылауға жіберілді.
«Зардап шеккен бес адам ТЖД мен денсаулық сақтау басқармасының санитарлық авиациясы арқылы Көкшетау қаласына жеткізілді. Тағы екі науқасты тасымалдау жоспарлануда», – деп нақтылады Ақмола облысы Төтенше жағдайлар департаменті.
Өрт толықтай сөндірілді. Құтқарушылар үйінділерді тазалау жұмыстарын жүргізіп жатыр. Оқиғаның себептері мен мән-жайы анықталуда.
Төтенше жағдайлар департаментінде жедел желі іске қосылды: 8 (7162) 514-298.
Ақмола облысының әкімдігі қаза тапқандардың отбасыларына және зардап шеккендерге барлық қажетті көмек көрсетілетінін мәлімдеді.
