ШҚО: Бір күнде 40 өрт сөндірілді
Шығыс Қазақстан облысында соңғы тәулікте 40-тан астам өрт шықты. Оның ішінде 34 рет дала өрті сөндірілді.
Алматы, NEGE. ШҚО ТЖД баспасөз қызметінің мәліметіне сүйенсек, бес жағдайда жалынның шығу себебі – халықтың отты абайсыз қолдануынан болған.
«Күршім ауданының орталығындағы Абылайхан көшесінде жер үйдің ауласындағы шаруашылық қора-жай өртенді. Тілсіз жау шарпыған жалпы аудан 50 шаршы метрді құраған. Семей қаласындағы Баздырев көшесінде үйдің шатыры, терезе мен есік блогы отқа оранды. Құтқарушылар 40 шаршы метр алаңдағы өртті өшірді», - делінген ақпаратта.
Бұдан бөлек, Көкпекті ауданында жеке тұрғын үйдің ауласындағы қора мен гараж өртенген. Қызыл жалын гараж ішінде тұрған 1976 жылғы «ВАЗ2101» автокөлігін шарпыды. Көк түтіннен 11 бас қой, 9 қозы өлген. Өрттің шығу себебі - электр жабдықтарын монтаждау және пайдалану кезінде қауіпсіздік талаптарын сақтамау.
Бір күн ішінде облыс аумағында 34 рет шөп жанды. Сол жерлерге шұғыл келіп жеткен департамент қызметкерлері тілсіз жауды сөндірген.