ШҚО-да судағы қауіпсіздік талаптарын бұзған 3 адам әкімшілік жазаға тартылды
Шығыс Қазақстан облысында су айдындарындағы қауіпсіздік шараларын күшейту мақсатында жедел профилактикалық жұмыстар жүргізілуде. Бұл туралы ҚР Төтенше жағдайлар министрлігі хабарлады.
АЛМАТЫ, NEGE. Облыс аумағында демалысқа арналған 25 ресми орын, шомылуға тыйым салынған 74 қауіпті аумақ және шағын көлемді кемелерде жүзуге рұқсат етілмеген 29 орын анықталған.
ШҚО Төтенше жағдайлар департаментінің құтқарушылары полиция және еріктілермен бірлесіп, судағы қауіпсіздік ережелерін түсіндіру және бақылау мақсатында 458 рейд өткізген. Нәтижесінде, судағы қауіпсіздік талаптарын елемеген 3 адам әкімшілік жауапкершілікке тартылды.
Рейдке қатысушылардың айтуынша, олардың басты мақсаты — тұрғындардың қауіпсіз демалысын қамтамасыз ету және қайғылы оқиғалардың алдын алу.
