ШҚО-да кәсіпкер әлеуметтік тауарды 127% үстемемен өзіне-өзі қайта сатқан
ШҚО-да бағаларды жасанды түрде көтеру схемасы әшкере болды.
Астана, NEGE. Сауда және интеграция министрлігінің мәліметінше, кәсіпкер қарақұмық жармасы, қант, тұз сияқты әлеуметтік тауарларды сатып алып, оларды өзіне қарасты ЖШС-ға қайта сатып, жасанды делдалдық тізбек құрған.
«Осындай "өзіне-өзі қайта сату" нәтижесінде халық үшін маңызды тауарлардың соңғы бағасы негізсіз өскен. Мәселен, қарақұмық жармасына 127% сауда үстемесін қосылған. Сатып алу бағасы 241 теңге болса, 550 теңгеден сатылған. Ал қантқа сауда үстемесі 45% жеткен. Ас тұзына 41% сауда үстемесін қойған», – дейді министрлік өкілдері.
Заңнамада әлеуметтік маңызы бар тауарларға сауда үстемесін 15%-дан асырмау талабы бар.
Құқық бұзушыға қатысты Әкімшілік құқық бұзушылық туралы кодекстің 204-4-бабы бойынша (Әлеуметтік маңызы бар азық-түлік тауарларына сауда үстемесінің шекті мөлшерін арттыру) әкімшілік іс қозғалып, айыппұл салынды.
