Шымкенттен Еуропа және Азия елдеріне тікелей рейстер ашылды
Шымкент қаласында Германия, Венгрия, ҚХР, Оңтүстік Корея, Египетке тікелей рейстердің салтанатты ашылуы өтті.
Алматы, NEGE. Іс-шара ҚР Президенті Қасым-Жомарт Тоқаевтың Қазақстан әуежайларының жүктерді тасымалдау мүмкіндіктерін кеңейту және аэрохабтарды дамыту жөніндегі тапсырмасын орындау шеңберінде іске асырылды. Рейстер Boeing 737 типті әуе кемелерінде орындалады.
27 мамырдан бастап Шымкент-Мюнхен бағытындағы әуе рейсі аптасына 2 рет сейсенбі және бейсенбі күндері ұшады.
Шымкент-Будапешт бағыты аптасына 2 рет сейсенбі және сенбі күндері орындалады.
29 мамырдан бастап Шымкент-Шанхай бағыты аптасына 2 рет дүйсенбі және бейсенбі күндері ұшады.
Шымкент-Сеул рейсі аптасына 2 рет дүйсенбі және бейсенбі күндері, ал Шымкент-Каир рейсі әр бейсенбі сайын орындалады.
24 маусымнан бастап Шымкент-Каир рейсі аптасына 2 рет дүйсенбі және бейсенбі күндері орындала бастайды.
2 шілдеден бастап Шымкент-Сиань әуе рейсі іске қосылып, сәрсенбі және сенбі күндері аптасына 2 рет орындалады.
4 шілдеден бастап Шымкент-Үрімші рейсі аптасына 2 рет сейсенбі және жұма күндері жүзеге асады.
Жаңа тікелей рейстердің іске қосылуына арналған іс-шарада Қазақстанның авиациялық басшылары, сондай-ақ бес мемлекеттің дипломатиялық өкілдері сөз сөйледі.
«Бұл рейстердің ашылуы Шымкент әуежайының жаңа терминалы базасында халықаралық әуехабты дамытуға мүмкіндік беретін бастама», — деп атап өтті ҚР Көлік министрлігі Азаматтық авиация комитетінің төрайымы Салтанат Томпиева.
Шымкент әуежайының жаңа терминалы 2024 жылдың 25 желтоқсанында ашылды.
Терминал құрылысынан басқа перрон мен әуе кемелеріне арналған тұрақ орындарының реконструкциясы жүзеге асты. Вокзал маңы алаңы салынды.
Іс-шараға сонымен қатар SCAT әуекомпаниясының президенті Владимир Денисов, Шымкент қаласының туризм, сыртқы байланыстар және креативті индустрия басқармасының басшысы Бексұлтан Әділханов және Венгрия Республикасының Қазақстан Республикасындағы Бас консулы Саболч Карой Секе қатысты.
Еуропа және Азияға ашылған тікелей рейстер бұл өңірдің және республиканың іскерлік белсенділігі мен сауда-экономикалық байланыстарын арттыратын маршруттық желілерді дамытудың кезекті кезеңі.
