Шымкенттегі «Қиял әлемі» ойын-сауық саябағы сот шешімімен бұзылады
Кейінгі жылдары саябақта шыққан өрт салдарынан екі студент пен бір ер адам қайтыс болған.
Алматы, NEGE. 2011 жылы ЖШС Шымкент қаласының орталығында орналасқан саябақтан 4 гектар жер телімін жалға алған. Алайда, жалға алушы балалар орталығын құру жөніндегі міндеттемелерді орындаудың орнына «Қиял әлемі» ойын-сауық саябағын орналастырған. Содан жергіліктің әкімдік ЖШС-тің жалдау шартының талаптарын бұзғанын алға тартып, оны жарамсыз деп тану туралы сотқа жүгінді.
– МАЭС-ы және апелляция ЖШС-ны жер телімін коммуналдық меншікке қайтаруды міндеттеді. Бұл шешім заңды күшіне енгеннен кейін әкім саябақтағы заңсыз салынған құрылыстарды ЖШС есебінен бұзып, жер телімін бұрынғы қалпына келтіру туралы талап қоюмен сотқа жүгінген, - делінген Қазақстан Республикасы Жоғары сотының баспасөз қызметі таратқан ақпаратта.
Сотта ЖШС жер теліміне орналасқан аттракциондарды, әткеншектерді және басқа да құрылыстарды пайдалануға қабылдау актілерін заңнамада белгіленген тәртіппен ресімдеу туралы дәлелдемелерді ұсынбаған.
– Сот жоғарыда аталған мән-жайларды, сондай-ақ ЖШС-ның жер телімін заңсыз пайдалану фактісін ескере отырып, талап қоюды қанағаттандырып, ЖШС-ны рұқсатсыз иеленген 4 га жер телімін ғимараттарды бұзу арқылы бастапқы күйіне қайтарып босатуды міндеттеді. Шешім заңды күшіне енген жоқ, - делінген сот ақпаратында.