Шымкентте көңіл көтеру орнында есірткі сатқан әкімші ұсталды
Шымкентте көңіл көтеру орнында есірткі сатқан әкімші ұсталды, деп хабарлайды Polisia.kz.
Алматы, NEGE. Шымкент қаласы Полиция департаменті Есірткі қылмысына қарсы іс-қимыл басқармасының қызметкерлерімен жүргізілген кешенді жедел-іздестіру іс-шаралары барысында қаладағы көңіл көтеру орындарының бірінің 31 жастағы әкімшісі ұсталды. Жеке тінту барысында азаматшадан өзімен бірге болған есірткі салынған полиэтиленді пакет тәркіленіп алынды.
Сараптама қорытындысына сәйкес, тәркіленген заттың мефедрон екендігі расталып, жалпы салмағы 48 грамды құраған. Тергеу әрекеттері барысында аталған есірткінің көңіл көтеру орнында келушілерге таратуға арналғаны анықталды. Қосымша жедел-іздестіру іс-шараларының нәтижесінде есірткіні әкімшіге алып келген 31 жастағы ер азамат екені анықталып, ол құрықталды. Қазіргі кезде екеуі де уақытша ұстау изоляторына қамауға алынды.
Аталған дерек бойынша Қазақстан Республикасы Қылмыстық кодексінің 296-бабы 4-бөлігімен (Аса ірі мөлшердегі есірткі, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) қылмыстық іс қозғалып, сотқа дейінгі тергеп-тексеру амалдары жүргізіліп жатыр.