Шымкентте бір отбасы газдан уланып қайтыс болды
Шымкентте бір отбасының 5 адамы газдан уланып қайтыс болды, деп хабарлады Оtyrar.kz.
Алматы, NEGE. Алдын ала мәлімет бойынша, марқұм болғандар ерлі-зайыптылар мен олардың 2007, 2008 және 2012 жылы туған балалары.
Оқиға Ынтымақ-2 шағынауданындағы жеке тұрғын үйде болған.
«2023 жылдың 27 қазанында Шымкент қаласындағы жеке үйлердің бірінде көмірқышқыл газынан улану белгілері бар 5 адамның мәйіті табылды. Оқиға орнына жедел-тергеу тобы келді. ҚР Қылмыстық кодексінің 292-бабының 3-бөлігі (Өрт қауіпсіздігі талаптарын бұзу) бойынша қылмыстық іс қозғалды. Тиісті сараптамалар тағайындалды», — деді Шымкент қалалық ІІД баспасөз қызметі.
Газ мамандарының айтуынша, қайғылы оқиғаға дейін қауіпсіздік бойынша жүргізілген рейдтік жұмыстар кезінде газ құрылғысы тексеріліп, бұл үй газбен қамту желісінен ажыратылған көрінеді. Алайда үй иесі көгілдір отынды өздігінен қосып алған екен.