Шымкентте есірткіге мас жүргізуші полицейді көлігімен сүйреген
Шымкентте полицейді капотының үстінде тұрған күйі сүйреп кеткен жүргізуші ұсталды, деп хабарлады Шымкент ПД.
Алматы, NEGE. Шымкент қаласының ПД мәліметінше, 2 қаңтарда полицейлер көшелерді патрульдеу кезінде Toyota Highlander жүргізушісін бағдаршамның тыйым салатын белгісінен өткені үшін тоқтатқан. Жүргізушінің әрекетінде инспекторлар масаңдықтың белгісін байқаған.
Полицейдің құжат көрсету туралы заңды талабын орындамай, құқық бұзушы оқиға орнынан жасырынбақшы болды.
«Қауіпті жүргізушіні тоқтату және жол қозғалысының өзге қатысушыларының қатысуымен болуы мүмкін қайғылы оқиғаларды болдырмау үшін инспектор Бақытжан Боранбай автокөліктің алдына шығып, жолына тосқауыл болды. Бірақ рулдегі ер адам полицейге қарай қозғалысын жалғастырып, оны капотында бірнеше метрге дейін алып жүріп, оқиға орнынан бой тасалады.
Күдікті анықталып, ұсталды. Медициналық куәландыру нәтижесіне сәйкес ол есірткілік масаң күйде болған. Жайт бойынша қылмыстық іс қозғалды, тергеу шаралары басталды. Ұсталған азамат қамауда.
Билік өкіліне қатысты өміріне немесе денсаулығына қауіпті күш қолданғаны үшін ол 12 жылға дейін бас бостандығынан айырылуы мүмкін», - делінген Шымкент ПД хабарламасында.
