Шерзат Болаттың өліміне қатысты қылмыстық істі тергеу жұмыстары қашан аяқталатыны белгілі болды
Ішкі істер министрінің орынбасары Санжар Әділов Шерзат Болаттың өліміне қатысты тергеу қашан аяқталатынын айтты.
Алматы, NEGE. — Талғардағы кісі өлтіру дерегі бойынша жыл соңына дейін қылмыстық іс аяқталады. Қылмыстық істің материалдары танысу үшін ұсынылады. Тергеу аяқталу сатысында. Биылдың аяғына дейін барлық сараптаманы алып, тергеу іс-қимылдарын аяқтаймыз. Осы қылмыстық іс аясында 11 адам қамауда отыр. Олардың барлығы жауапқа тартылады. Прокурордың келісімі бойынша түпкілікті айып тағылады, — деді С. Әділов.
2024 жылы 4 қазанда Талғарда 16 жастағы Шерзат Болат кісі қолынан қаза тапты. Жақында оның ағасы Нұрғанат Ғайыпбаевтың денесі бейіт маңынан табылған болатын. Алдын ала болжам бойынша ол өз-өзіне қол жұмсаған. Сонымен қатар бүгін Шерзат Болаттың әкесі Қаржаубай Нұрымовтың ұсақ бұзақылық жасағаны үшін 15 тәулікке қамалғаны белгілі болды.
