Shell Қазақстан нарығынан кетпейді – Ақкенженов
Бұған дейін әлемдік БАҚ-та «Shell компаниясы Қазақстанға инвестиция құюын тоқтатады» деген ақпарат жарияланған еді. Мұндай ақпараттың таралуына компанияның бас атқарушы директоры Ваэль Саванның сөзі түрткі болған.
Астана, NEGE. Бүгін Ақорда кулуарында энергетика министрі Ерлан Ақкенженов бұл ақпаратқа қарамастан, Shell Қазақстанға инвестиция құюын тоқтатпайтынын мәлімдеді.
Shell компаниясының өкілі оған БАҚ Ваэль Саванның сөзін дұрыс түсіндірмегенін айтқан.
«Біз Shell компаниясына тиісті сауал жолдадық. Бірақ айта кетейін, өткен аптада Shell компаниясының өкілі Сьюзен Куган келіп, маған бұқаралық ақпарат құралдары Shell басшысының сөзін дұрыс түсіндірмегенін, шын мәнінде бәрі басқаша болғанын айтты. Компания Қазақстандағы қызметін әрі қарай да дамытуды көздеп отыр. Оған дәлел – олардың газ өндіру үшін қарастырып жатқан кен орындарының бірі. Әрі олар Қазақстанға инвестиция салуды жоспарлап отыр. Дегенмен Энергетика министрлігі ресми сауал жолдағандықтан, Shell компаниясының ресми жауабын күтуіміз керек», – дейді Ақкенженов.
Еске салсақ, бұған дейін Қашаған кен орнын игеріп отырған халықаралық компаниялар 5 миллиард доллардан астам экологиялық айыппұлға келіспей, Қазақстан үкіметінің үстінен арбитражға жүгінетіні айтылды. Бұл жөнінде Bloomberg-ке Shell компаниясының өкілі мәлімдеген.
Экологиялық айыппұл күкіртті сақтау талаптарына байланысты салынған.