Шавкат Рахмоновтың жұбайы мен ұлы жол апатына ұшырады
Желіде әйгілі спортшы Шавкат Рахмоновтың жұбайы мен ұлының жол апатына ұшырағаны туралы ақпарат тарады.
Алматы, NEGE. Аталған оқиғаға қатысты Жамбыл облысының полиция департаменті пікір білдірді, дегенмен нақты есімдер аталмады.
Ресми мәліметке сәйкес, жол-көлік оқиғасы 27 шілде күні сағат 08:50-де республикалық маңызы бар «Алматы – Екатеринбург» тас жолының 299-шақырымында болған.
Гүлайым Рахмонова ұлы мен құрбыларымен бірге Қарағандыдан Алматыға «Toyota Land Cruiser» жол талғамайтын көлігімен бара жатқан. Halyqstan телеграм каналының хабарлауынша, көлікті Шавкат Рахмоновтың жұбайы жүргізген.«Toyota Land Cruiser 200» маркалы автокөлік жүргізушісі — Қарағанды облысы бағытынан Алматыға қарай келе жатып, рөлге ие бола алмай, көлік аударылып кеткен.
Оқиға орнында 39 жастағы жолаушы қаза тапты. 35 жастағы әйел Мойынқұм аудандық ауруханасына бара жатып қайтыс болды.
Рахмонова мен оның 3 жасар ұлы Шу қалалық ауруханасына жеткізіліп, травматология бөліміне жатқызылды. Олардың жағдайы орташа ауырлық дәрежесінде.
Қазір бұл факті бойынша Қылмыстық кодекстің «Көлік құралдарын басқарған тұлғалар тарапынан жол жүру немесе көлік құралдарын пайдалану ережелерін бұзу, абайсызда екі немесе одан да көп адамның өліміне әкеп соққан» бабы бойынша сотқа дейінгі тергеу басталды.
Көлік айыппұл тұрағына қойылды.